ଲେଖକ- ଅରବିନ୍ଦ ରଥ
ଟ୍ରାଫିକି ପୁଲିସ ଜଗିଛି
ଗଳିକନ୍ଦି ସାହି ଛକ ବଜାରରେ ପୁଲିସିଙ୍କ ମେଳା ଜମିଛି
ଠେଙ୍ଗାବାଡି ସହ ନଥିପତ୍ର ଧରି ଶିକାର ଅପେକ୍ଷା କରୁଛି
ଗାଳିଚାଳକଙ୍କ ଛାତି ଭିତରଟା ଧାକୁଡୁ ଧାକୁଡୁ କମ୍ପୁଛି
ମୁଖ୍ଯରାସ୍ତା ଛାଡି ସହର କନ୍ଦିରେ ଲୁଚିଛପି ଗାଡି ଗଡୁଛି
ଟ୍ରାଫିକି ପୁଲିସି ଜଗିଛି।।......୨
ତେଲଟାଙ୍କି ଛାଡି ହେଲମେଟ ଦୋକାନେ ଗ୍ରାହକଙ୍କ ଭିଡ ଜମୁଛି
ଏତେ ମୁଣ୍ଡ ପାଇଁ ନାହିଁ ହେଲମେଟ ନିଅଣ୍ଟ ଅବସ୍ଥା ଘାରିଛି।
ମହାଶକ୍ତିଶାଳୀ ପୁଲିସିବାହିନୀ ଗୁଡେଇ ତୁଡେଇ ଧରୁଛି
ବୁଢୀଆଣି ଜାଲେ ମାଛି ଯେହ୍ନେ ଫସେ ଚାଳକ ବିଚରା ଫସୁଛି।
ଟ୍ରାଫିକି ପୁଲିସି ଜଗିଛି।।......୪
ଗଣିଗଣି ତଣ୍ଡ ଭାଙ୍ଗେ ମେରୁଦଣ୍ଡ ଜନତା ଗୁମୁରି କାନ୍ଦୁଛି
ରିପୋର୍ଟ କୁହଇ ଜରିମନା ଭୟେ ଦୁର୍ଘଟଣା ମାତ୍ରା କମିଛି
ପାହାନ୍ତି ପହରୁ ରାତି ଅଧ ଯାଏ ଚାଲାଣ କାଟତି ଚାଲିଛି
ଫାଇନ ଆଦାୟେ ଆମ ରାଜ୍ଯ ପରା ଅଉଲ ନମ୍ବର ପାଇଛି
ଟ୍ରାଫିକି ପୁଲିସି ଜଗିଛି।।..........୫
ମାହାନ୍ତି ମାଇପ ହେଲମେଟ ତଳେ ଧାର ଧାର ଲୁହ ଢାଳୁଛି
କେଡେ ମୁଲାୟମ ସାମ୍ପୁକରା କେଶ ଘୋଡାଲାଞ୍ଜ ପରି ଦିଶୁଛି
କଟକ ବିଖ୍ଯାତ ଗାଙ୍ଗୁଲି ଲଳନା ଆନନ୍ଦରେ ହେଣ୍ଡୁ ମାରୁଛି
ହେଲମେଟ୍ ପିନ୍ଧି ଶହେ ନାଗରଙ୍କ ଗାଡି ପଛ ଲୁଚି ଯାଉଛି
ଟ୍ରାଫିକି ପୁଲିସି ଜଗିଛି।..........୬
ଗୁଣ୍ଡା ବଦମାସ ଖଣ୍ଟଙ୍କ ଉତ୍ପାତ ସହସ୍ରଗୁଣରେ ବଢିଛି
ଚୋର ଧରିବାକୁ ପୁଲିସି ଅଭାବ ଥାନାରେ କୋଲପ ଝୁଲୁଛି
ଝିଣ୍ଟିକା ମାରିଣ ବଣି ପୋଷା ନୀତି ଅତି ସୁରୁଖୁରେ ଚାଲିଛି
ପାନଖଣ୍ଡେ ଜାକି ବୁଲେଟ୍ ରେ ଚଢି କେମିତି ଯିବି ମୁଁ ଭାବୁଛି
ଟ୍ରାଫିକି ପୁଲିସି ଜଗିଛି।...............୭
– ସମାପ୍ତ-
No comments:
Post a Comment